Panalangin Kay San Lorenzo Ruiz de Manila at kasamahang Martir

San Lorenzo Ruiz de Manila (in white)
together with other martyrs in Japan.

PANALANGIN KAY SAN LORENZO RUIZ DE MANiLA AT MGA KASAMANG MARTIR
September 19-27

Si San Lorenzo Ruiz ang unang Pilipinong santo at martir. Siya ay isang laykong sakristan at katekista na pumunta sa bansang Hapon. Doon niya sinapit ang kamatayan dala ng pag-uusig sa pananampalataya. Sinasabi na kanyang mga pasakit ay nawika niya, "Sanlibo man aking buhay, bawat isa pa rin ay aking iaalay sa Diyos."


Amang Mapagmahal, ang Iyong Anak na si Hesukristo ay naghandog ng kanyang buhay para sa kaligtasan ng tanan. Kasihan kami ng iyong pag-ibig upang maihandog ang aming buhay para sa iyo at sa aming kapwa tao. Inakay rin ng mapagpala Mong kamay ang iyong mga lingkod na sina San Lorenzo Ruiz at mga kasama sa lupain ng Hapon upang tularan ang sakripisyo ni Kristo at ipamansag ang Mabuting Balita ng Kaligtasan.

Isinasamo namin na sa pamamagitan ng panalangin ng mga banal na martir na kami'y maging matatag sa pananampalataya tulad nila at maging kasangkapan ng pagpapahayag ng mabuting balita sa aming bayan at sa mga bansang nasa paligid namin. Dinggin Mo ang aming kahilingan at ang tanging biyayang aming hinihingi:
(Banggitin ang mga kahilingan)
Kaisa ni San Lorenzo Ruiz at mga kasama, hinihiling namin ito sa pamamagitan ni Hesukristo na aming Panginoon. Amen.